Дәүләт Думасында кредит алган чакта «уйларга өч көн» бирергә тәкъдим иттеләр
Дәүләт Думасының «Яңа кешеләр» фракциясе башлыгы урынбасары Александр Демин РФ Үзәк банкы рәисе Эльвира Нәбиуллинага кредит алган чакта уйларга мәҗбүри өч көн вакыт бирү тәкъдиме белән мөрәҗәгать юллады. Бу РИА Новости карамагында булган документтан билгеле булды.
«Гражданинга кредит килешүен имзалап кабат раслаганнан соң өч көн узгач кына акча алырга рөхсәт итүне күздә тотучы мәҗбүри чорны кертү һәм әлеге чор дәвамында теләсә кайсы вакытта килешүне имзалаудан баш тарту хокукы бирү кредит алучыларга финанс карарларын аңлырак рәвештә кабул итәргә һәм импульсив рәвештә алынган кредитлар санын киметергә генә ярдәм итеп калмаячак. Бу чара шулай ук кредитлау үсеше темпларын һәм икътисадка инфляция басымын киметергә дә мөмкинлек бирәчәк», - диелгән документта.
Документта билгеләп үтелгәнчә, мондый чордан соң (мәсәлән, кредит килешүен имзалаганнан соң өч көн узгач) кредит рәсмиләштерүдән баш тарту хокукы бирү кешеләргә кредит шартларын үлчәп анализларга һәм үзенең финанс мөмкинлекләрен бәяләргә вакыт бирә торган файдалы чара булырга мөмкин.
«Кредитлар еш очракта реклама басымы тәэсирендә яки тотрыксыз эмоциональ халәттә рәсмиләштерелә», - дип өсти автор.