Миңнеханов: Россия дошманнары җәмгыятебезне таркатырга теләгәндә, берләшү аеруча мөһим

Татарстан Рәисе Рөстәм Миңнеханов киләсе бәйрәмнәрдә республика халкының иминлеген тәэмин итәргә һәм чараларны югары дәрәҗәдә уздырырга йөкләмә бирде. Бу хакта ул республиканың Хөкүмәт йортында узган шимбә киңәшмәсендә әйтте дип хәбәр итә Рәиснең матбугат хезмәте.

Республика җитәкчесе искәрткәнчә, дүшәмбе, 4 ноябрьдә Россиядә Халыклар бердәмлеге көне билгеләп үтелә. Әлеге бәйрәм 1612 елга барып тоташа, ул вакытта килеп чыгышлары, җәмгыятьтә тоткан урыннары, диннәре төрле булган кешеләр бергәләп туган җирне чит ил баскыннарыннан азат итә.

«Ил дошманнары җәмгыятебезне таркатырга, халыкларны милли һәм дини нигездә талаштырырга тырышкан шартларда бердәмлек аеруча мөһим», – диде Рөстәм Миңнеханов.

Татарстан рәисе хәбәр иткәнчә, Халыклар бердәмлеге көненә багышланган тантана республика дәрәҗәсендә Муса Җәлил исемендәге опера һәм балет театрында, шулай ук Татарстанның барлык районнарында узачак.

Шул ук көнне православие христианнары Казан Изге ана иконасына багышланган бәйрәм уздыра. Миңнеханов христианнарны киләсе бәйрәм белән тәбрикләде һәм чараларны югары дәрәҗәдә уздырырга, иминлекне тәэмин итәргә боерды.

Моннан тыш, 6 ноябрьдә Татарстанда республика Конституциясе көне уздырыла.

«Төп закон җәмгыятьтә масштаблы үзгәрешләр барган катлаулы чорда кабул ителде. Ул бүген дә безнең төп документ булып санала, гражданнарның хокукларын һәм иреген гарантияли, тарихи, милли һәм рухи традицияләрне, халыкларыбызның мәдәниятен һәм телләрен саклауны тәэмин итә, гражданлык тынычлыгының һәм килешүнең ышанычлы нигезен, республиканың уңышлы социаль-икътисади үсешен тәшкил итә», – диде Татарстан Рәисе.

Сүзен йомгаклап, ул татарстанлыларның, республиканың төп законының барлык нормаларын үтәп, Россия бердәмлеген һәм Татарстанның чәчәк атуын ныгытуга юнәлдерелгән иҗади курсны дәвам итәчәгенә ышаныч белдерде.