Социалдык тармактын колдонуучусу Айтилек Орозбеков кармалганы кабарланды
“Бийликти күч менен басып алууга ачык чакырыктар” беренеси менен айып коюлуптур. Ал бийликти жамандап жазган окшойт. Саат беште сотто бөгөт чарасы каралат. Ал күнөөнү мойнуна албайт, “эч кандай чакырык кылган эмесмин” дейт. Анын жазгандарын жакынкы күндөрү экспертизага жөнөтүп, чакырык бар же жокпу аныктайт экен”, - деди адвокат Исмаил Каримжанов.
Ал эми Айтилектин досумун деп тааныштырып, атын ачык айтпоону суранган жаран Айтилек Орозбеков Тик Токтогу видеосу жана Бүтүн Кыргызстан партиясынын мүчөсү болгону үчүн кармалганын билдирди.
Атайын кызмат Айтилек Орозбековго коюлган айып жана козголгон кылмыш иши тууралуу комментарий бере элек.
Айтилек Орозбековдун жакындарынын айтымында, ал буга чейин Жогорку Кеңештин депутаты Эрулан Көкүловдун коомдук башталыштагы жардамчысы, кийин “Бүтүн Кыргызстан” оппозициялык партиясынын мүчөсү болгон.
Кыргызстанда социалдык тармактын колдонуучулары жарыялаган билдирүүлөрү үчүн ар кандай айып менен камакка алынган окуялар катталып келет.
“Азаттык” былтыр декабрь айында 2020-жылдын ноябрынан бери социалдык тармактарга пикир билдирип, комментарий жазып же бөлүшкөнү үчүн укук коргоо органдарына суракка чакырылып, иш козголгон же жазага тартылган 30га чукул адамдын тизмесин жарыялаган. Иш ачылгандардын арасында 70 жаштагы байбичеден тарта 20 жаштагы студентке чейин бар. (MKt)