Чирмешән район үзәгендә яшәүче Радик Закиров үз гаражында К-700 мини-тракторы ясаган. Бу хакта «Безнең Чирмешән» газетасы яза.
«Авыл Кулибины» сап-сары төстәге мини-тракторын 3 ай эчендә җыеп чыга. Августта башланган эш октябрь башында төгәлләнгән.
«Тракторның двигателе кытайныкы - мотоблокларга куела торган, 15 ат көчле, тапшырулар тартмасы - коробкасы, руль идарәсе, күчәре - мосты классика «Жигули»дан», - ди Радик Закиров.
Оста әлеге техника белән кышын кар эттерергә уйлый, аның өчен көрәге бар, җир сукалаганда сабан тагар өчен җайланма урнаштырылган.
«Шундый трактор ясарга күптән кызыгып йөри идем инде. Чирмешәндә аны җыйган егетләр бар, алардан да сораштырдым, интернеттан да карадым», - ди ул.
