Төркиянең Анталия шәһәрендә Татарстан киносы көннәре башлана
Иртәгә, 2 нче ноябрьдә, Төркиянең Анталия шәһәрендә Татарстан киносы көннәре башлана. Бу хакта «Татар-информ» хәбәрчесенә «Татарстан мәдәният җәмгыяте» җитәкчесе Гөлназ Җиһангирова хәбәр итте.
Проектны оештыручылар – Татарстан Мәдәният министрлыгы, «Татаркино» мәдәният учреждениесе һәм Анталия шәһәренең «Татарстан мәдәният җәмгыяте».
«Тамашачылар игътибарына «Әпипә» музыкаль комедиясе, татар әдәбияты классигы Галимҗан Ибраһимовның «Алмачуар» әсәре мотивлары буенча төшерелгән, Татарстан белән Казахстанның уртак проекты - «Тарлан», Зифа Кадыйрова әсәре буенча төшерелгән «Сөмбел» картиналары тәкъдим ителәчәк», – диде Гөлназ Җиһангирова.
Ул фильмнар айга бер мәртәбә татар телендә рус субтитрлары белән күрсәтеләчәген әйтте.
«Әлеге проект «Татаркино» оешмасы директоры Миләүшә Айтуганова тарафыннан татар халкының тамырлары, гореф-гадәтләре, телен саклау нияте белән оештырылган һәм елдан-ел үзенең географиясен арттыра бара», – дип искәртте милләттәшебез.
«Татар киноларын карарга милләттәшләребезне генә түгел, барлык русча белүчеләрне актив рәвештә реклама ясап, чакырып киләбез, чөнки әлеге уникаль проект Анталиядә яшәүче диспораларны, төрле милләттәге кешеләрне сәнгать аланында үзара таныштыра, берләштерә ала торган чараларның берсе дип саныйм. «Татаркино» оешмасының фидакяр хәзмәткәрләренә, җитәкчесе Миләүшә Айтугановага зур рәхмәтебезне белдерәбез!» - ди Гөлназ Җиһангирова.