Ютазы районы Урыссу бистәсе үзәк мәчетендә хатын-кызлар өчен Коръән укырга өйрәнү үзәге ачылды. Бу хакта Бөтендөнья татар конгрессы хәбәр итә.
Тантанада Татарстан Республикасы мөселманнары Диния нәзарәте башлыгы, мөфти Камил хәзрәт Сәмигуллин, Ютазы районы башлыгы урынбасары Закуан Ильясов, Татарстанның көньяк-көнчыгыш казые, Ютазы районы имам-мөхтәсибе, Урыссу бистәсе имам-хатыйбы, «Фәнис» мәдрәсәсе директоры Марат хәзрәт Мәрданшин, шулай ук районның барлык имамнары катнашты. Камил хәзрәт Сәмигуллин чарада катнашучыларны үзәк ачылу белән чын күңелдән котлады, әлеге матур вакыйганың шаһиты булу мөмкинлеге өчен Аллаһы Тәгаләгә ихлас рәхмәтен белдерде.
Мөфти Коръәнне танып белүнең мөһимлеген аерым ассызыклап үтте. «Тахфиз» үзәге ачылу җәмгыятьнең рухи яктан баюына һәм хатын-кызларның дини белемгә омтылышын хуплауга сизелерлек өлеш кертәчәк, дип билгеләде ул. Коръәнне өйрәнү әхлакый нигезләрне ныгытуга ярдәм итә, яшь буынны тәрбияләүдә аерылгысыз өлеш булып тора, дип белдерде мөфти.
Район башлыгы урынбасары Закуан Ильясов шулай ук барлык җыелучыларны җылы котлады, үзәкнең хатын-кызлар өчен белемнәрен тирәнәйтә, иманын ныгыта һәм тәҗрибәле остазлардан ярдәм ала торган урын булачагына ышаныч белдерде. Ул ассызыклаганча, мондый үзәкләрне үстерү җәмгыять тормышын ныгыту белән бергә бара, бу бөтен республика өчен әһәмиятле.
«Фәнис» мәдрәсәсе директоры Марат хәзрәт Мәрданшин укучыларга һәм укытучыларга уңышлар теләде, үзәкнең эшчәнлеге төбәктә татулык урнаштыруга ярдәм итәчәк, дип ышандырды. Ул барлык кызыксынучыларны белем бирү дәресләренә кушылырга чакырды һәм сыйфатлы белем алырга булышырга вәгъдә итте.
