Юрий Камалтынов җиденче чакырылыш ТР Дәүләт Советында «Бердәм Россия» фракциясе җитәкчесе итеп сайланды. Фракциянең парламентта узган утырышында бер тавыштан шундый карар кабул ителде, дип яза «Татар-информ».
«Ышаныч күрсәткән өчен рәхмәт. Безнең алда зур, җитди эш тора. Фракциянең төп бурычы – Дәүләт Советы депутатының вәкаләтләренә керүче процедуралар аша партия сәясәтен алып бару», - диде Камалтынов.
Альберт Хәбибуллин һәм Ольга Воронова аның урынбасарлары итеп билгеләнде.
Парламентка 100 кешедән 99 депутат сайланды. Шулардан 50 кеше – партия исемлекләре буенча, 49 кеше – бер мандатлы округларда.
Җиденче чакырылыш ТР Дәүләт Советы депутатларын сайлау нәтиҗәләре буенча «Бердәм Россия» - 76,75 процент, КПРФ – 10,54 процент, ЛДПР – 4,41 процент, «Яңа кешеләр» – 4,21 процент, «Гадел Россия – Патриотлар – Дөреслек өчен» партиясе 3,27 процент тавыш җыйды.
Парламентта «Бердәм Россия» вәкилләре күпчелекне тәшкил итә: 86 депутат сайланды, шуларның 52се урыннарын саклап калды.
