Кытайда 46 елга беренче тапкыр пенсия яшен арттырачаклар

Кытай Халык Республикасында пенсиягә чыгу яшен арттырырга карар кылганнар, дип яза Xinhua мәгълүмат агентлыгы. Элегрәк Кытай гражданнары барысыннан да иртәрәк пенсионерлар була иде, дип хәбәр итә Reuters. Өстәвенә, пенсия яшен күтәрү турындагы карарны 46 ел эчендә беренче тапкыр кабул иттеләр, дип өстәде Bloomberg.

Пенсия яшен арттыруның сәбәбе булып, 2021 елда, кытайлыларның гомер озынлыгының 78 яшькә кадәр үсеше (чагыштыру өчен, 1960 елда 44 яшь булган) тора. Өстәвенә, бу күрсәткеч 2050 елга 80 яшькә кадәр җитәр дип көтелә. Шулай ук илдә өлкән яшьтәге кешеләргә ярдәм итүче эшләүче халык саны кими бара.

Хәзер 2025 елның 1 гыйнварыннан Кытай ир-атлары 63 яшендә пенсиягә чыгачак, ә хатын-кызлар - 55 яшьтә. Хезмәткәр вазифаларында эшләүче Кытай хатыннары пенсиягә 58 яшьтә чыга. Элек алар 60, 50 һәм 55 яшьтә пенсионер булган.

Шунысы кызык, Япониядә һәм Көньяк Кореяда кешеләр пенсиягә тагын да соңрак чыга: ирләр – 65 яшьтә, ә хатын – кызлар исә 63 яшьтә, дип яза РБК.

Барысыннан да озаграк эшләүче кешеләр Австралиядә, Даниядә, Грециядә, Италиядә, Исландиядә һәм Нидерландта яши, анда пенсиягә 67 яшьтә генә чыгалар. Өстәвенә, ир-атлар һәм хатын-кызлар өчен бу өлкәдә «планка» бертөрле.

Чагыштыру өчен: Россиядә пенсиягә чыгу яшен акрынлап күтәрергә булдылар. Әйтик, 2028 елда ир-атлар пенсиягә 65 яшьтә чыгачак, ә хатын-кызлар - 60 яшьтә. Россиялеләрнең пенсия яше, иске указларга караганда, ир-атлар өчен дә, хатын-кызлар өчен дә 5 елга арткан.