Мәскәү татарлары Курскидан эвакуацияләнгән балалар өчен бәйрәм оештырды

Мәскәү татарлары Курск өлкәсенең һөҗүмгә дучар булган районнарыннан эвакуацияләнгән балалар өчен бәйрәм оештырды. Бу хакта Мәскәү татарлары автономиясе хәбәр итә.

«Россия халыклары ассамблеясе» гомумроссия иҗтимагый-дәүләт оешмасы чакыруы буенча, генераль директор урынбасары Ирина Бабакова белән бергә, Мәскәү татарлары автономиясе активистлары һәм Татар мәдәни үзәге артистлары Серпухов шәһәре татарлары автономиясе белән берлектә Татар мәдәнияте көне үткәрде. Чара «Лесная поляна» шифаханәсендә узды.

Татар мәдәни үзәге артистлары балаларда бәйрәм кәефе булдыру өчен барысын да эшләде. «Илдан» бию ансамбле җитәкчесе Надия Ягудина һәм коллектив солисткалары алар өчен татар биюләре буенча мастер-класс үткәрде. «Хәзинә» ансамбле җитәкчесе Илмира Галимова исә сәнгать иҗаты дәресе оештырды, диелә хәбәрдә.

Таган районы татарлары автономиясе башлыгы Рәфыйк Вәлитов балалар белән хәрәкәтчән уеннар уйнады. Шулай ук ачык һавадагы мәйданчыкта импровизацияләнгән концерт булды. Анда артистлар гына түгел, барлык катнашучылар популяр һәм балалар җырларын башкарды.

Артистлар үзләре әйтүенчә, кечкенә Сабантуй килеп чыкты. Бәйрәм барышында балалар күңел дә ачты, татар халкының мәдәнияте һәм традицияләре турында да белде. Чара милли камыр ризыклары белән традицион татар чәе эчү белән тәмамланды. Татар мәдәни үзәге артистлары Серпухов татарлары автономиясе активистлары һәм Рәис Гомәровка чараны оештыруда актив катнашуы өчен рәхмәт белдерде, дип хәбәр ителә.