Новосибирск өлкәсендә XVI Татар яшьләре себер фестивале башланды
Новосибирск татар мәдәнияте йортында XVI Татар яшьләре себер фестивале старт алды. Бу хакта Новосибирск татар мәдәни үзәге хәбәр итә.
Бүген иртә таңнан мастер-класслар башланып китте. «Чыбыктан үрү» мастер-классын Зөлфәр Имамов уздыра.
«Татар аш-суы» мастер-классында исә Нәсимә Бабкина («Ак калфак» татар хатын-кызлары иҗтимагый оешмасының Колыван районы Умар (Юрт-Ора) авылындагы филиалы җитәкчесе) һәм Алисә Тимеркәева (Новосибирск өлкәсе төбәк татар милли-мәдәни автономиясе каршындагы Новосибирск өлкәсе «Ак калфак» хатын-кызлар оешмасы җитәкчесе) белән Чат татарлары ризыгы – «Санса» пешерергә өйрәнгән. Делегатлар ризыкны барлык катнашучылар өчен әзерләгән.
Шулай ук «Новосибирск татарлары» баш мөхәррире Виктория Купцова «Инфостильдә язабыз» дип исемләнгән кызыклы мастер-класс үткәрде, диелә хәбәрдә.