Мәүлид бәйрәмен уздыруга багышланган матбугат очрашуында Татарстан казые, Татарстан Республикасы Диния нәзарәтенең шәригать мәсьәләләре буенча бүлек башлыгы Булат Мөбәрәков Мәүлид бәйрәменең соңгы елларда гына чыккан бәйрәм булмавы, ә электән килгән гореф-гадәт икәнлеген әйтте.
«Инкыйлабка кадәр галимнәребез тарафыннан Пәйгамбәребезнең (с.г.в.) тууына, туган көненә багышлап язылган касыйдәләр (Касыйдә – Көнчыгыш халыкларының лирик шигырьләренең шигъри формасы – ТИ иск.) булган. Мөселман кешесе өчен Пәйгамбәребезнең тууы әһәмиятле вакыйга булып тора, бәлки, Советлар чорында аны кайбер кешеләр белмәгәннәрдер. Ләкин инкыйлабка кадәр Пәйгамбәребез Мөхәммәднең (с.г.в.) бу дөньяга килүе хакында сөенеч белдерү, Мәүлид бәйрәмен уздыру гореф-гадәте безнең халыкта булган, чөнки Аллаһы Тәгалә аны хуплый», – дип, аңлатты хәзрәт.
«Пәйгамбәребез Мөхәммәднең (с.г.в.) бу дөньяга килүе – бик әһәмиятле вакыйга. Аллаһы Тәгалә Коръәни Кәримдә: «Мин сине бу галәмнәргә бары тик рәхмәт һәм мәрхәмәт буларак кына җибәрдем», – дип, әйтә. Шулай ук бер хәдисендә Пәйгамбәребез: «Сез, әти-әниегез, балаларыгыз һәм дөньядагы бөтен кешеләргә дә мин сөекле булганчыга кадәр, алар камил рәвештә иман китерәчәк түгел», – ди. Ягъни Пәйгамбәребез Мөхәммәдкә (с.г.в.) мәхәббәт иманыбызның бер шарты булып тора», – дип, сөйләде ул Пәйгамбәрнең дөньяга килү әһәмияте турында.
Татарстан Республикасы мөселманнары Диния нәзарәте аппараты җитәкчесе Ирек Арысланов Мәүлид бәйрәменең Совет чорында да югалмавын, ә бары тик башка исем белән генә аталуын искәртте.
«Совет чорында Чүпрәле, Буа якларында каршылык аз булсын өчен ашны «ясин» дип атый торган булганнар. Динне тыю вакытыларында җомга намазларына, ашка җыелучылар саклану өчен, үзләрен «ясин»гә, ягъни үлгәннәрне искә алырга җыелдык, дип аңлатканнар. Соңыннан Мәүлид кичәләренең дә «ясин» дип аталуы ачыкланды, Мәүлид кичәләре Совет чорында да үткәрелгән, без аны әйтә генә алмаганбыз», – диде ул.
