Экзитпол: Дәүләт Советына сайлауда «Бердәм Россия» һәм КПРФ лидерлыкка чыккан
Экзитполлар мәгълүматлары буенча, сайлаучыларның 75,7 проценты – «Бердәм Россия» партиясеннән кандидатлар өчен, 10,8 проценты «КПРФ» вәкилләре өчен тавыш биргән. Бу хакта Бердәм мәгълүмат үзәгендә матбугат конференциясендә Социаль-фәлсәфи фәннәр һәм массакүләм коммуникацияләр институты директорының фәнни эшчәнлек буенча урынбасары Мария Ефлова әйтте, дип яза «Татар-информ».
Экзитпол нәтиҗәләре буенча, сайлаучыларның 4,3 проценты – «Яңа кешеләр» партиясе өчен, 4,8 проценты – ЛДПР, 3,3 проценты – «Гадел Россия – Патриотлар – Дөреслек өчен» партиясе вәкилләре өчен тавышын калдырган. 1 процентка якын бюллетень бозылган, диде спикер.
Сайлау участокларыннан чыккач сораштыру бүген «Иҗтимагый фикер – Татарстан» фонды тарафыннан оештырылган. Аерым алганда, сайлаучыларның 29 проценты Казанда сораштырылган, 38 проценты – башка шәһәрләрдә, 33 проценты – авыл торак пунктларында сорауларга җавап биргән.
Ефлова сүзләренчә, социологлар сайлау кампаниясендә катнашкан 10 меңгә якын кешене сораштырган. 60 проценты кемгә тавыш биргәнен әйтергә ризалашкан.
«Бүген үткәрелмәгән сораштырулар нәтиҗәләре буенча, тавыш бирүдә сораштырылган 69,8 процент кеше катнашкан. Төгәл нәтиҗәләр иртәгә билгеле булачак», – диде спикер.
- Бүген Татарстан Дәүләт Советы депутатларын сайлау узды. 50 депутат – партия исемлекләре, тагын 50се бер мандатлы сайлау округлары буенча сайлана.
- Үзәк сайлау комиссиясе биш сәяси партиянең исемлекләрен теркәде: «Яңа кешеләр», «ЛДПР – Россия либераль-демократик партиясе», «Гадел Россия – Патриотлар – Дөреслек өчен», «Бердәм Россия», «КПРФ – Россия Федерациясе Коммунистлар партиясе».
- 100 депутат мандатына барлыгы 397 кандидат дәгъва кыла.