«Гаилә белән сайлыйбыз» бәйгесендә унберенче җиңүче Казан кешесе булды
«Гаилә белән сайлыйбыз!» телемарафоны эфирында шул исемдәге фотобәйгенең унберенче җиңүчесен билгеләделәр. Нибары бер сәгатьтән iPhone 15 смартфонының уникенче иясе билгеле булачак, ә 20:00 сәгатьтә «Лада Веста» автомобиле уйнатыла. Хәзергә бәйгедә 75 211 кеше катнашкан.
Бәйгедә унберенче җиңүче – Валентин Егоров булды. Аның «Вконтакте» социаль челтәрендәге мәгълүматларына караганда, ул Казанда яши.
Бәйге катнашу шартлары мондый: Татарстан Республикасында тавыш бирүчеләргә тапшырыла торган махсус беләзек белән сайлау участогы (бинаның тышында, ә эчендә түгел) фонында гаилә белән фотога төшәргә кирәк. Сурәттә сайлау участогына керә торган урынның танып була торган элементы: мәсәлән, язу, плакат яки баннер булырга тиеш. Фотода беләзек 18 яшькә җиткән кимендә бер кешедә күренергә тиеш.
Алга таба бу фотоны социаль челтәрдә (мәсәлән, «ВКонтакте»да) аккаунтка урнашытырырга һәм #ТатарстанАлга һәм #ВсейСемьейНаВыборы дигән ике мәҗбүри хештег куярга кирәк. Аккаунт һичшиксез ачык булырга, аватарда фото булырга тиеш. Моннан тыш, Татарстан территориясендә теркәлгән, республика кешесе генә катнашучы була ала.
VII чакырылыш Татарстан Дәүләт Советы депутатларын сайлау 8 сентябрьдә, иртәнге җидедә башланды. Партия исемлекләре һәм бер мандатлы округлар буенча иллешәр депутат сайлана.
Татарстан Үзәк сайлау комиссиясе биш сәяси партия исемлеген теркәде: «Яңа кешеләр», «ЛДПР – Россиянең либераль-демократия партиясе», «Гадел Россия – Патриотлар – Дөреслек өчен», «Бердәм Россия», «КПРФ – Россия Федерациясенең коммунистлар партиясе».
100 депутат мандатына барлыгы 397 кандидат дәгъва итә.