Татарстан Үзәк сайлау комиссиясе Рәисе Андрей Кондратьев ТНВ телеканалында «Галә белән сайлыйбыз!» телемарафонында Татарстанда тавыш бирү көне ничек узганын сөйләде.
Ул республика Дәүләт Советына депутатлар сайлау тантаналы мохиттә узды, диде.
«Бөтен сайлау кампаниясе һәм сайлау шундый тантаналы мохиттә узды», – диде ул.
Аның сүзләренчә, участоклар ябылгач иң җаваплы мизгел – тавышларны санау башлана.
«20:00 сәгатьтә сайлау участоклары ябылды, ә күзәтүчеләрнең, безнең участок сайлау комиссиясе әгъзаларының бу эше республикадагы бөтен участокларда тавышларны санап бетергәнче дәвам итәчәк. Искәртеп үтим, республикада 2760 участок сайлау комиссиясе һәм 16 мең күзәтче эшләде», – диде Андрей Кондратьев.
Татарстан Үзәк сайлау комиссиясе киләчәктә республиканы нинди итеп күрергә теләве турында да уртаклашты.
«Татарстан – Россиянең терәк төбәге. Бездә нәтиҗәле икътисад, ял, уку һәм эш өчен лаеклы һәм яхшы шартлар бар. Шуңа күрә, республикабызның парламенты кабул иткән законнарга күп нәрсә бәйле», – диде Кондратьев.
Шулай ук спикер киләчәктә татарстанлыларны бик бай сәяси программа көтә диде.
«Мартта узган Россия Федерациясе Президентын сайлаулар сайлау кампанияләрендә бик җитди сәхифәне ачты. Менә хәзер без Татарстан Республикасы Дәүләт Советына депутатлар сайлыйбыз. Киләсе елда Татарстан Рәисен сайлаячакбыз. Һәм 2026 елны Федераль Җыенның Дәүләт Думасына депутатлар сайлау белән төгәлләячәкбез. Сайлаучыларыбызга уңышлар телим», – дип йомгаклады Андрей Кондратьев.
Кичке сигездә Татарстанда VII чакырылыш Дәүләт Советына депутатлар сайлау төгәлләнде. Искәртеп үтик, иртәнге җидедән республикада 2760 сайлау участогы эшләде. 18:00 сәгатькә булган мәгълүматлар буенча, республикадагы барлык сайлаучыларның 63 проценты тавыш бирүдә катнашкан.
VII чакырылыш Татарстан Дәүләт Советы депутатларын сайлау 8 сентябрьдә, иртәнге җидедә башланды. Партия исемлекләре һәм бер мандатлы округлар буенча иллешәр депутат сайлана.
Татарстан Үзәк сайлау комиссиясе биш сәяси партия исемлеген теркәде: «Яңа кешеләр», «ЛДПР – Россиянең либераль-демократия партиясе», «Гадел Россия – Патриотлар – Дөреслек өчен», «Бердәм Россия», «КПРФ – Россия Федерациясенең коммунистлар партиясе».
100 депутат мандатына барлыгы 397 кандидат дәгъва итә.
