Татарстан Премьер-министры Алексей Песошин финанс тармагы хезмәткәрләрен һәм ветераннарын Россиядә 2011 елдан башлап ел саен 8 сентябрьдә билгеләп үтелә торган һөнәри бәйрәмнәре белән котлады.
«Бу бәйрәм дәүләтнең икътисадый системасын үстерүдә һәм ныгытуда финанс өлкәсе хезмәткәрләренең әһәмиятле ролен ассызыклауга юнәлдерелгән. Республиканың нәтиҗәле финанс системасы Татарстанга республика программаларын вакытында гамәлгә ашырырга, амбициоз федераль проектларда катнашырга мөмкинлек бирә, аның уңышлы һәм динамик үсешенә ярдәм итә. Һичшиксез, монда финансистларның көндәлек хезмәте, аларның профессиональлеге, намуслылыгы, гаделлеге зур роль уйный», — диде республика Премьер-министры.
Ул финанс тармагы хезмәткәрләренә үз эшләренә намуслы караулары һәм республиканың социаль-икътисадый үсешенә зур өлеш кертүләре өчен рәхмәт белдерде, шулай ук аларга уңышлы эш, сәламәтлек, бәхет һәм иминлек теләде.
