Мордовиядә татар авыллары мөселманнары беренче сыйныф укучыларын мәктәпкә әзерли
Мордовиянең Ләмбрә һәм Чирмиш авыллары мөселман җәмгыятьләре «Баланы мәктәпкә җый» хәйрия акциясе үткәрде. Бу хакта Россия Мөфтиләр шурасы хәбәр итә.
Акциянең координаторы – Ләмбрә авылы имамы Рәшит хәзрәт Сәйфулов. Аның сүзләренчә, мәчетләргә йөрүчеләрнең күбесенең мәктәп яшендәге, шул исәптән беренче сыйныфка баручы балалары бар.
«Бу – бала тормышында мөһим һәм җаваплы вакыйга, шуңа күрә без ата-аналарга балаларны мәктәпкә җыюда ярдәм итәргә булдык. Барлык беренче сыйныфка баручыларга канцелярия кирәк-яраклары җыелмалары һәм кечкенә генә татлы күчтәнәчләр бүләк иттек. Без, әлбәттә, күп балалы гаиләләргә өстенлек бирдек. Ләмбрәдә беренче сыйныфка керүче укучыларның гаиләләрендә өчәр, дүртәр һәм хәтта алтышар-җидешәр бала», – дип билгеләп үткән Рәшит хәзрәт.
Ул шулай ук булачак беренче сыйныф укучыларына белем алуның мөһимлеге һәм киләчәктә әти-әнинең горурлыгы һәм җәмгыятебезнең файдалы әгъзалары булу өчен тырышып укырга кирәклеге турында сөйләгән.
Чирмиштә беренче сыйныфка баручы укучыларга бүләкләр тапшыруда шулай ук авыл аксакаллары да катнашкан. Алар имамның инициативасын югары бәяләде һәм бу изге эштә катнашкан һәркемгә рәхмәт белдерде, диелә хәбәрдә.