Рөстәм Миңнеханов күп балалы аналарга дәүләт бүләкләре тапшырды
Татарстан Рәисе Рөстәм Миңнеханов күп балалы аналарга бүләкләр тапшырды. Бүләкләү тантанасы 27 августта Казан Кремлендә узды.
Республика җитәкчесе матбугат хезмәте хәбәр иткәнчә, чарада Татарстаннан 45 гаилә булган. Тантаналы кабул итүдә Миңнехановның тормыш иптәше Гөлсинә Миңнеханова да катнашты.
Бүләкләнүчеләр арасында 5 бала әти-әнисе Илнур Мотыйгуллин һәм Алия Нуралиева бар иде. Аларга Миңнеханов «Ата-ана даны» ордены медальлен тапшырды. Татарстан Рәисе шулай ук күп балалы Фирүзә Шәрипова (Азнакай), Фәния Кәримова (Әлмәт), Мария Псурцева (Лениногорск), Гүзәлия Гыйльфанова (Тукай районы) һәм Нина Андреевага (Чирмешән) «Ана даны — Материнская слава» медален тапшырды.
«Гаилә — ул гореф-гадәтләрне, мәдәниятне, туган телне саклау нигезе. Сез үз өстегезгә ата-ананың бәяләп бетергесез игелекле хезмәте — искиткеч балаларны лаеклы тәрбияләүне алдыгыз», - дип мөрәҗәгать итте Татарстан Рәисе кабул итүдә катнашучыларга.
Нәкъ менә гаиләдә төп кешелек кыйммәтләре - җиргә һәм туган йортка мәхәббәт, Туган илгә тугрылык, җаваплылык һәм хезмәт сөючәнлек салынуы турында әйтте ул.
Миңнеханов Ватаннарын саклап махсус хәрби операциядә катнашучыларның аналарына һәм хатыннарына аерым рәхмәт сүзләре белдерде. Аның сүзләренчә, андый хатын-кызлар хәрби хезмәткәрләр өчен ышанычлы тыл һәм таяныч булып тора.
«Без күп балалы гаиләләрнең, тәрбиягә бала алган гаиләләрнең күңел юмартлыгы, мәхәббәте һәм кайгыртучанлыгы белән горурланабыз», - диде Миңнеханов.