Бүген республиканың Лениногорск районы Югары Каран бистәсендә «Татар аты» беренче Бөтенроссия фестивале башланды. Аның гомуми приз фонды 678 мең сум тәшкил итә.
Татар токымлы атлар чабышы, кыргый атларны җигүгә өйрәтү буенча «Тай-тулак» команда ярышы, «Аударыш» уены чараның төп вакыйгалары булачак. Шулай ук башка ярышлар да оештырыла. Моннан тыш, чара кысаларында татар токымлы атларны рингка алып чыгу планлаштырылган. Ул республикада икенче тапкыр үткәрелә. Белгечләр ике, өч һәм аннан олырак яшьтәге бияләр һәм айгырлар арасында иң яхшыларны билгеләячәк.
«Татарстан авыл хуҗалыгы һәм азык-төлек министры, ТР Атчылык һәм ат спорты федерациясе рәисе Җәббаров Марат Азат улы исеменнән барыгызны да беренче «Татар аты» фестивале белән котларга рөхсәт итегез. Аның төп максаты - татар токымлы атларны, атчылыкны популярлаштыру, тугандаш халыкларны берләштерү», - дип искәртте ТР Авыл хуҗалыгы һәм азык-төлек министрлыгының терлекчелек тармакларын үстерү бүлеге әйдәп баручы киңәшчесе Айрат Хәбибуллин.
Шуннан соң ул фестивальнең оештыручылары һәм рухландыручыларына ведомство башлыгы исеменнән Рәхмәт хатлары тапшырды.
Материал Рамия Гарифуллина катнашында әзерләнде