Татарстан Рәисе администрациясе Татарстан Республикасының атказанган мәдәният хезмәткәре, республика Язучылар берлеге әгъзасы һәм дәүләт хезмәте ветераны Әнәс Хәсәнов вафат булу сәбәпле туганнары һәм якыннарының кайгысын уртаклаша.
1991-1999 елларда Әнәс Хәсәнов ТР Президенты матбугат үзәген җитәкләде һәм республика җитәкчесе эшчәнлеген объектив һәм оператив яктыртуга зур игътибар бирде, дип билгеләп үттеләр ТР Рәисе администрациясендә.
«Аның тырышлыгы белән хакимият органнары һәм массакүләм мәгълүмат чаралары арасында нәтиҗәле хезмәттәшлек билгеләнде, даими нигездә телетапшырулар, радиотапшырулар чыгарылды, төрле басмаларда интервьюлар, Татарстанның иҗади үсеше турында язмалар урнаштырылды», — диелгән хәбәрдә.
Әнәс Хәсәнов – өч тулы метражлы документаль фильм авторы, «Татарстанның беренче Президенты Минтимер Шәймиев» китабы автордашы һәм тәрҗемәчесе, «Минтимер Шаймиев. Прогресс через стабильность» 11 томлык басмасы һәм Татарстан Республикасының беренче Президенты юбилей альбомының мөхәррир-төзүчесе.
«Хәсәнов профессиональлек һәм намуслылык өлгесе, үз идеаллары һәм ышануларына тугры кеше, шулай ук бик күп журналистлар буыннары өчен акыллы остаз иде. Хәсәнов Әнәс Хәсән улы турында якты истәлек безнең йөрәкләрдә мәңгегә сакланыр», - диелгән некрологта.
Элегрәк хәбәр ителгәнчә, журналист, язучы, тәрҗемәче, дәүләт һәм җәмәгать эшлеклесе Әнәс Хәсәнов 89 яшендә вафат булды.
