Халыкара балалар оешмалары ассоциациясе БРИКС саммитында төзелергә мөмкин
«Беренчеләр хәрәкәте» Россия Президенты Владимир Путин кушуы буенча балалар оешмаларының яңа халыкара ассоциациясен булдырырга әзерләнә. Аның рәсми оешуы эре халыкара чараларның берсендә узачак, хәзер аның Казандагы БРИКС саммиты булуы турында фикер алышалар. Бу хакта «Татар-информ га ТР Рәисе ярдәмчесе, «Беренчеләр хәрәкәте»нең Татарстан бүлеге җитәкчесе Тимур Сөләйманов хәбәр итте.
Яңа оешма бөтен дөнья буенча балалар һәм яшьләр оешмаларын зур бердәм челтәргә берләштерү мәйданчыгы булачак. Бу аларга ел дәвамында элемтәләрне сакларга, тәҗрибә уртаклашырга, ә җәй көне балалар лагерьларында очрашырга мөмкинлек бирәчәк.
«Хәзер оешманың эш форматы турында фикер алышу бара. Анда Ислам хезмәттәшлеге оешмасы илләре мөһим роль уйнаячагына ышанабыз», - дип йомгаклады Сөләйманов.
«Беренчеләр хәрәкәте»н булдыру турындагы Указны 2022 елның җәендә Россия Президенты Владимир Путин имзалады. Бөтенроссия оешмасының Татарстан бүлеген республиканың элеккеге Яшьләр министрлыгы башлыгы Тимур Сөләйманов җитәкләде. Хәрәкәт белән берлектә эшләячәк Республика Координацион советын төзү турындагы указга 2023 елның 14 февралендә Татарстан рәисе Рөстәм Миңнеханов кул куйды.