Татарстанда «Махсус хәрби операциядәгеләргә ярдәм» инструменты эшләнде, ул хезмәткәрләре махсус операциядә катнашкан кече һәм урта бизнес вәкилләренә ташламалы дәүләт финанс ярдәменә дәгъва кылырга мөмкинлек бирә. Махсуслаштырылган продукт «Кече һәм урта эшмәкәрлек» илкүләм проекты кысаларында әзерләнгән. Бу хакта Татарстан Икътисад министрлыгында сөйләделәр.
«Мондый компанияләргә ярдәм итү өчен без киметелгән еллык ставка (1 процент) буенча махсус финанс продукты эшләдек. Уңайлы шартлар хезмәткәрләр китүгә бәйле теләсә нинди вакытлы чыгымнарны бетерергә һәм компанияләргә өстәмә ярдәм күрсәтергә, аларны үстерү өчен кирәкле финанслауны җәлеп итүдә ярдәм итәргә тиеш», - диде Татарстан икътисад министрының беренче урынбасары Наталья Кондратова.
«Махсус хәрби операциягә ярдәм» продукты буенча ставка, Үзәк банкның төп ставканы арттыру карарына карамастан, минималь дәрәҗәдә - елына 1 процент кала. 300 меңнән 5 млн сумга кадәр ярдәмне теләсә нинди эшмәкәр ихтыяҗлары өчен 3 айдан 3 елга кадәр вакытка алырга мөмкин.
Контракт буенча махсус хәрби операциягә бер яки берничә хезмәткәре киткән эшмәкәрләрдән заемга заявкалар кабул ителә, шул ук вакытта хезмәткәрләрнең хәрби хезмәткә кайчан китүе (ташламалы программаны гамәлгә ашырганчы яки гамәлгә ашырганда) мөһим түгел.
Шартлар белән җентекләбрәк «МСП.РФ» порталында танышырга һәм гариза тутырырга мөмкин. Республикада бизнеска һәм үзмәшгульләргә дәүләт ярдәме «Кече һәм урта эшмәкәрлек» илкүләм проекты кысаларында Татарстан Икътисад министрлыгы һәм ведомство карамагындагы институтлары тарафыннан гамәлгә ашырыла.
