Татарстанда 1 июльдән торак-коммуналь хуҗалык өчен тарифлар 10,8 процентка арткан. Бу санны Татарстан Республикасы Тарифлар буенча Дәүләт комитеты рәисе Александр Груничев республика Министрлар Кабинетында узган брифингта атады.
«Татарстанда гражданнар түләвенең үзгәрү индексы 2024 елның 1 июленнән 10,8 процент тәшкил итә. Тариф кампаниясе кысаларында оешмалар биргән гаризалар буенча алар 37,1 процент иде. Күргәнебезчә, без бу индексны, оешмалар гаризалары белән чагыштырганда, 3,5 тапкырга диярлек киметә алдык», – диде спикер.
Груничев республика буенча мөмкин булган 4,9 процент тайпылыш турында искә төшерде. Бу республиканың кайбер районнарында тарифлар 15,7 процентка арткан дигәнне аңлата.
Коммуналь хезмәтләргә бәяләр 1,5 елда беренче тапкыр артты. Груничев бу чорда башка товарларга бәяләрнең ничек үзгәрүен мисал итеп китерде. Мисал өчен, дизель ягулыгы 2022 елның 1 декабреннән 2024 елның 1 июленә кадәр 12,7 процентка кыйммәтләнде, азык-төлек кәрзине бәядә 13,2 процентка артты, күчемсез милеккә бәяләр үсеше 36,2 процент тәшкил итә. Росстат мәгълүматлары буенча, шул ук вакытта товарларга инфляция 12,5 процентка, хезмәтләргә 17,2 процентка күтәрелгән.
«Бу чорда хезмәт хакы 31,2 процентка артты. Шуңа күрә без, нигездә, бу динамикада торабыз, ә кайдадыр түбәнрәк тә», - диде Татарстан Тарифлар буенча дәүләт комитеты рәисе.
