Зәйдә мөмкинлекләре чикле кешеләр өчен спорт фестивале үткәрделәр

Зәй районы «Бердәм Россия» партиясенең Татарстан төбәк бүлеге ярдәмендә уздырыла торган «Россия көче» Бөтенроссия спорт марафонына кушылды. «Энергия» стадионында мөмкинлекләре чикләнгән кешеләр өчен спорт фестивале узды. Бу хакта «Зәй яңалыклары» сайтында хәбәр ителә.

Физик мөмкинлекләре чикле, әмма чиксез талантлы зәйлеләр фестивальдә кулдан эшләнгән әйберләрен тәкъдим итте һәм иҗади номерлар белән чыгыш ясады. Алар арасында махсус хәрби операциядә катнашучыларга маскировкалау челтәрләре үрү һәм химера-костюмнар тегү, тиз әзерләнә торган ашлар әзерләү, гуманитар ярдәм җыю белән шөгыльләнүче волонтерлар да бар.

«Физик мөмкинлекләре чикле кешеләр безнең шәһәрдә һәм районда бик актив. Алар күп кенә мәдәни һәм спорт чараларында катнаша, махсус хәрби операция зонасындагы хәрбиләргә ярдәм итә. Сезгә ныклы сәламәтлек, бәхет һәм тыныч күк йөзе телим», – дип мөрәҗәгать итте фестивальдә катнашучыларга район башлыгы урынбасары Петр Уразайкин.

Бөтенроссия сукырлар җәмгыятенең Зәй бүлекчәсенең иҗтимагый, мәдәни, спорт тормышында актив катнашулары, социаль тернәкләндерү һәм интеграцияләү эшендә намуслы хезмәтләре өчен Илгизәр Илдарханов, Светлана Китызина, Геннадий Умнов, Нәзирә Смирнова, Валентина Пискунова район башлыгының Рәхмәт хатлары белән бүләкләнде.

«Бердәм Россия» партиясенең Зәй җирле бүлеге башкарма секретаре Петр Тимаськов та фестивальдә катнашучыларга актив тормыш позицияләре өчен рәхмәт белдерде.

Район сукырлар җәмгыяте рәисе Мария Костюченко һәм инвалидлар җәмгыяте рәисе Антонида Николаева сәламәтлекләре чикләнгән зәйлеләр белән бик зур эш алып баралар. Алар шулай ук Рәхмәт хатлары белән бүләкләнде.

Фестивальнең иң яшь катнашучылары өчен яшьләр эшләре һәм физик культура, спорт һәм туризм идарәләре хезмәткәрләре күңелле конкурслар һәм спорт ярышлары оештырды. Сәламәтлеге мөмкинлекләре чикле өлкән яшьтәге кешеләр спорт йөреше, аркан тартышу, кул көрәштерү буенча ярышты, шулай ук рәхәтләнеп шахмат һәм шашка уйнады.