Чувашиянең Шөмерле шәһәре Җәмигъ мәчетендә балалар өчен рухи-әхлакый курслар узды. Әлеге чараларны чыгарылыш кичәсе белән тәмамладылар. Бу хакта Россия мөселманнары Дини җыены матбугат хезмәте хәбәр итә.
Бәйрәмдә балалар өчен квест, кына белән рәсем ясау (мехенди), бүләкләр һәм тәм-томнар белән ярминкә, грамоталар белән бүләкләү тантанасы, чәй өстәле оештырылган.
Курсларда яшь мөселманнар дин нигезләренә төшенгән, пәйгамбәрләр тарихы белән танышкан, гарәп алфавиты өйрәнгән.
Дәресләрдән тыш, алар алган белемнәрен ныгыту өчен кызыклы биремнәр үтәгән, урамда актив уеннар уйнаган, шулай ук мәчет имамы артыннан кабатлап, өйлә намазы укыган.
Чувашия мөселманнары Диния нәзарәте җитәкчелеге курсларны оештырган өчен Җәмигъ мәчете имамына, укытучыларга һәм бу эшкә катнашы булган бар кешегә рәхмәт җиткерә. Шулай ук, балаларга бер чыгарылышын бүләк иткән «УММАKIDS» балалар журналына да аерым рәхмәт белдерәләр.
