Россия Президенты Владимир Путин Санкт-Петербургта адмирал Федор Ушаковка һәйкәл ачуда катнашты. Атаклы флотчының хәрби сәнгате һәм новаторлыгы Россия флотының алга таба үсешен билгеләде. Бу хакта Кремль матбугат хезмәте хәбәр итә.
«Тәвәккәл, талантлы флотчы, Ватанның чын патриоты Ушаков үз карьерасында бер генә көрәштә дә җиңелмәгән. Үзенең флагман кораблен иң алга куйган, матросларны һәм командирлары кыюлыгы һәм батырлыгы белән илһамландырган, хәрби вазгыятькә тиз һәм төгәл бәя биргән һәм хәлиткеч һөҗүм ясаган», – диде дәүләт башлыгы.
Ул адмиралны Россиянең халыкара йогынтысын арттыру, аның куәтен ныгыту өчен бик күпне эшләгән, диде. «Аерым алганда, ул моряклар тәрбияләүгә һәм укытуга күп игътибар бирә. Бу аның васыятьләрен һәм идеалларын Россия Хәрби Диңгез флотының хәзерге вәкилләре өчен дә якын итә. Алар өчен Ушаков элеккечә хәрби батырлык өлгесе булып тора», – диде Владимир Путин.
Президент һәйкәлне ясауда һәм урнаштыруда катнашучыларга рәхмәт әйтте.
«Безнең бурыч – Ватанның бөтен геройларын истә тоту. Алар арасында бөек флотчы, кыю адмирал, рус җиренең патриоты Федор Федорович Ушаков һичшиксез аерым урын биләп тора», – дип йомгаклады ул. Мондый үрнәкләр теләсә нинди авырлыкларны һәм сынауларны батырларча узарга, туган илең өчен җиңәргә һәм алга атларга канатландыра, дип өстәде.
