Татарстанда гражданлык активлыгын һәм патриотик тәңгәллекне арттыруга йөз тоткан чаралар уздырырга җыеналар. Аларны оештыру чыгымнары 10 миллионнан артыграк, дип хәбәр ителә дәүләт сатып алулары сайтындагы мәгълүматта.
Тендер документларыннан күренгәнчә, республиканың җиде шәһәрендә (Яшел Үзән, Буа, Чистай, Бөгелмә, Түбән Кама, Чаллы һәм Казан) быелның 30 сентябренә кадәр «Синең чират» акциясе уздыру планлаштырыла. Бу чараларда кимендә ике мең кеше катнашырга тиеш, алар лекторийларның темасын үзләре билгели ала. Медиа, креатив индустрияләр, эшмәкәрлек, психология, туризм кебек юнәлешләрдә спикерлар белән очрашулар була.
Форумны уздыру өчен чигүле 14 свитшот, лонгслив, шулай ук ике мең евробуклет, ручка, флешка, шопер, стикерпаклар һәм бейджиклар сатып алына. Проектның дизайн-макетын эшләү, диджей чыгышлары фото һәм видеофиксация каралган.
Моннан тыш, быелның 31 октябренә кадәр Казанда 14-35 яшьлекләр арасында Россияне һәм кече ватанны (аның географиясе, тарихы, мәдәнияте һәм башкалар) иң яхшы белүче исеменә квиз-турнир оештыру да планлаштырыла. Квизда олимпия челтәре форматында 16 уен булачак. Иң яхшы команда кубок ота, барлык катнашучыларга да грамоталар, толстовкалар һәм Россия турында китаплар бүләк итәчәкләр.
Заказчысы – Татарстан Республикасының Яшьләр үзәге. Акчалар федераль һәм республика бюджетыннан биреләчәк. Гаризалар кабул итү 2 августта төгәлләнә, башкаручыны 5 августта билгеләячәкләр.