Россиянең берничә зур шәһәрендә, шул исәптән Воронеж, Калининград, Пенза һәм Казанда хәвефле тенденция күзәтелә: социаль челтәрләрдә яшүсмерләрне эзәрлекләүгә юнәлдерелгән каналлар барлыкка килә. Бу хакта үзенең Telegram-каналында Куркынычсыз интернет лигасы директоры Екатерина Мизулина сөйләде.
Аның сүзләренчә, әлеге ресурслар балигъ булмаганнарның фотосурәтләрен чыгара, аларны мыскыллап комментарийлар яза һәм корбаннарның шәхси мәгълүматларын күрсәтә.
Бу каналларны оештыручыларның әлеге материалларны алып ату өчен акча таләп итүләре аеруча борчу тудыра. Суммалар 200 сумнан 350 сумга кадәр. Акчаны «бурычны кайтару» тамгасы белән Сбербанк карталарына күчерергә кушалар.
Моңа бәйле рәвештә Екатерина Мизулина әлеге каналларны җентекләп тикшерүне сорап Генераль прокуратурага мөрәҗәгать итәргә планлаштыра. Моңарчы мондый очракларда инде шундый чара күрелгән булган.
Ул шулай ук Сбербанк түләү системасы янап акча алу схемасында кулланылуын исәпкә алып, банкның игътибарын да әлеге проблемага җәлеп итәргә кирәк, дип саный.
