Татарстан Сәламәтлек саклау министрлыгы 2024 елда республикада яшәүче 1,2 миллион кешегә диспансеризация үткәрергә планлаштыра. Бу хакта Татарстан Республикасы сәламәтлек саклау министры Марсель Миңнуллин «Татар-информ»да узган Татарстанда «Сәламәтлек саклау» илкүләм проектын гамәлгә ашыруга багышланган матбугат очрашуында хәбәр итте.
«Профилактик медицина – ул беренчел буын: поликлиникалар, участок табиблары һәм фельдшер-акушерлык пунктлары эше. Безнең төп бурыч – җитди авырулар булу куркынычын иртә стадияләрдә ачыклау. Вакытында диспансеризация үткәрү кешегә якындагы 20 елга сәламәт тормыш тәэмин итәргә мөмкин», - дип ассызыклады министр.
Марсель Миңнуллин билгеләп үткәнчә, диспансеризациядә катнашучыларның планлаштырылган санының 60 процентын эшкә сәләтле халык тәшкил итә, алар еш кына профилактик тикшеренүләр үтүгә «кул селти».
«Бездә «соры зона» дигән нәрсә бар – ике ел дәвамында поликлиникаларга йөрмәгән кешеләр. Бу бик куркыныч. Күпләр зарланыр нәрсәсе булмаса, моны сәламәтлек билгесе дип саный, ләкин бу дөрес фикер түгел. Бары тик табиблар гына артык тазалык, гипертония яки онкология авырулары кебек җитди проблемаларны иртә стадияләрдә ачыклый ала», - дип аңлатты министр.
Сүзен йомгаклап, Миңнуллин тагын бер кат «Сәламәтлек саклау» илкүләм проекты кысаларында үткәрелә торган диспансеризация җитди авыруларны ачыклау һәм кисәтү өчен нәтиҗәле корал булып тора, дип ассызыклады.
