«Милләт мирасы» илкүләм премиясендә катнашу өчен гаризалар кабул итү башланды

«Милләт мирасы» илкүләм премиясендә катнашу өчен гаризалар кабул итү башланды. Анда территорияләрне үстерүгә, мәдәни мирасны саклауга, уңайлы шәһәр мохитен булдыруга өлеш кертүчеләр – студентлар, дизайнерлар, инвесторлар, массакүләм мәгълүмат чаралары катнаша ала. Бу хакта чараның матбугат хезмәте хәбәр итә.

Оештыручылар билгеләп үткәнчә, премия Россия Президенты Владимир Путинның Федераль Җыенга юлламасында әйтелгән йөкләмәсен үтәү кысаларында үткәрелә. «Борынгы биналар, утарлар һәм храмнар — безнең милли үзенчәлекнең һәм буыннар арасындагы аерылгысыз бәйләнешнең гәүдәләнеше», – дип белдерде ул чакта дәүләт башлыгы.

Премия ел саен уздырыла һәм Россиянең мәдәни һәм тарихи мирасын үстерү һәм саклауга юнәлдерелгән, инновацион һәм креатив проектлар булдыру һәм гамәлгә ашыруга ярдәм иткән профессионаллар һәм оешмаларны билгеләп үтә. Ул төзелеш һәм архитектура өлкәсендә технология һәм методлар үсешенә, мәдәни мираска булышлык күрсәтүгә, бу өлкәдә белгечләр арасында тәҗрибә уртаклашу өчен платформа булдыруга ярдәм итә.

• Вакыйга һәм аның номинацияләре турында күбрәк белер, шулай ук гариза бирер өчен «Милләт мирасы» сайтына керергә кирәк. Гаризалар 12 августка кадәр кабул ителәчәк.
• Җиңүчеләрне бүләкләү тантанасы 27 сентябрьдә Мәскәүдәге утар комплексларының берсендә узачак.