Ульяновск өлкәсе мөселманнары Диния нәзарәте июль аенда балалар өчен мөселман дисциплиналарын өйрәнү һәм сәламәтләндерү-спорт программасы белән җәйге лагерьләр оештыра. Бу хакта Россия мөселманнары Диния нәзарәте хәбәр итә.
15 июльдән 24 июльгә кадәр ун көн дәвамында Чынлы бистәсе мәчетендә мөселман гаиләләреннән егерме ике малай Ислам нигезләре һәм изге Коръәнне өйрәнәчәк. Көн саен дүртешәр дәрес уза: әдәп (этика), дога, хәдисләр, Коръән һәм башка юнәлешләр. Дәресләрне Чынлы мәчете имамы Азат Гайнуллин һәм Казан һәм Уфа мәдрәсәләре студентлары Гомәр Синьков һәм Абдулла Куряев үткәрә. Сәламәтләндерү программасы кысаларында балалар бассейнга йөри, тренажерларда шөгыльләнә, спортның уен төрләренә игътибар бирә. Малайларны көн саен тәмле төшке аш көтә, диелә хәбәрдә.
Ун яшьтән унбиш яшькә кадәрге егерме биш малай һәм кыз Карсун районы Нугай иле авылындагы балалар лагерендә ислам нигезләрен өйрәнгән. Төшкә кадәр малайлар өчен, төштән соң кызлар өчен дәресләр үткәрелгән. Укытучылары – мәчет имамы Наил Идиятуллов. Иске Кулаткыда башлангыч программа буенча гарәп телен өйрәнү белән җиде яшьтән унбер яшькә кадәрге унбер бала шөгыльләнгән. Балалар өчен лагерьләр шулай ук Чынлы районының Димитровград һәм Елоховое Озеро авылында узган.
