2024 елның беренче яртыеллыгында иң зур ихтыяҗ сату буенча хезмәткәрләргә булган. Бу хакта ПЭК һәм hh.ru тикшеренүләренә сылтама белән РИА Новости яза.
«Гыйнвар-июнь айларында Россиядә сатулар буенча белгечләргә ихтыяҗ зур булган – бу сегменттагы вакансияләр саны миллионнан артып киткән», – диелә хәбәрдә.
Шулай ук рекрутерлар эшче персоналга (миллион кеше), җиһазлар җитештерү һәм сервис хезмәте күрсәтү буенча белгечләргә (732 мең кеше), төзелеш һәм күчемсез милек өлкәсендә хезмәткәрләргә (710 мең кеше) һәм транспорт-логистика тармагында эшләүчеләргә (706 мең кеше) ихтыяҗ кичерә.
Барыннан да бигрәк азлап сату, иминиятләштерү, сервис сегменты, сату һәм логистика өлкәләрендә хезмәткәрләр кытлыгы килеп чыккан. Шулай ук өй персоналы, юрист һәм иминиятчеләр эзләү белән дә проблемалар бар.
ПЭКның персонал буенча директоры Виктория Цой белдергәнчә, валюта курсы үзгәрү һәм инфляция аркасында Россия базары чит ил белгечләре өчен җәлеп итүчәнлеген югалта.
