Түбән Новгород өлкәсе Кочко-Пожарки авылындагы мәчетнең 30 еллыгын билгеләп үттеләр
Эш сәфәре белән Түбән Новгородка килгән РФ мөселманнары Диния нәзарәте делегациясе Түбән Новгород өлкәсенең Сергач районы Кочко-Пожарки авылындагы мәчетнең 30 еллыгы уңаеннан үткәрелгән тантаналы чараларда катнашты. Бу хакта Россия мөселманнары Диния нәзарәте хәбәр итә.
Чарада РФ мөселманнары Диния нәзарәте рәисе урынбасары мөфти Рушан Аббәсов, РФ мөселманнары Диния нәзарәтенең Үзәкләштерелгән ревизия комиссиясе рәисе Җафәр Фәйзрахманов, Мәскәүдәге Тарихи мәчетнең имам-хатыйблары Рамил Садыйков һәм Руфат Әхмәтҗанов, шулай ук Түбән Новгород өлкәсе мөселманнары Диния нәзарәте рәисе Гаяз Закиров, РФ мөселманнары Диния нәзарәте рәисенең Идел буе федераль округындагы Тулы вәкаләтле вәкиле Мөнир Беюсов, Сергач районы администрациясе вәкилләре һәм җирле депутатлар, Түбән Новгород өлкәсе мөселманнары Диния нәзарәте имамнары, иҗтимагый оешмалар вәкилләре, күрше авыл һәм салаларда яшәүчеләр һәм кунаклар катнашкан.
Чарада катнашучыларга мөрәҗәгатендә Рушан Аббәсов Россия мөселманнарының рухи лидеры мөфти шәех Равил Гайнетдин исеменнән сәламләү һәм котлау сүзләрен җиткергән. Ул әлеге юбилей чарасының аеруча әһәмиятле булуын билгеләп үткән. Аерым алганда, Кочко-Пожарки авылындагы мәчет – гыйбадәт йорты гына түгел, ә 1991 елда дини азатлыкка ирешкән Россия мөселманнарының дини тормышын торгызу символы, дигән ул.
Дума рәисе Гаяз Закиров шулай ук үзенең чыгышында динне һәм татарның Ислам традицияләрен саклаган кешеләр – имамнар һәм мәхәллә кешеләре турында сөйләгән. Ул совет чорында Кочко-Пожарки авылында Түбән Новгородның сигезьеллык татар мәктәпләре өчен укытучылар әзерләүче техникум булуын, ә барлык фәннәрне татар телендә укытучы бу мәктәпләрнең төбәкнең барлыгы 34 татар авылында эшләвен искәрткән. Гаяз Закиров фикеренчә, туган телне яхшы белү дини эзәрлекләүләр чорында Ислам белемен саклап калуга да ярдәм иткән.
Гаяз Закиров Кочко-Пожарки авылында мәчет салуның башында торучылар һәм мөселман активистларга Түбән Новгород өлкәсе мөселманнары Диния нәзарәте исеменнән рәхмәт хатлары тапшырган.