Татарстанда татар телендә фәнни-тикшеренү һәм педагогик эшчәнлек белән шөгыльләнүче галимнәр һәм укытучылар өчен грантларның күләмен ике тапкырга, 200 мең сумнан 100 мең сумга кадәр киметтеләр. Республика Министрлар Кабинетының карарын ТР Премьер-министры Алексей Песошин имзалады.
«Дәүләт программасы нигезендә <...> ун грантның һәркайсының күләме 100 000 (йөз мең) сумны тәшкил итә», - диелә документта.
Шул ук вакытта грант алу өчен конкурста хәзер татар телендәге монографияләр, мәкаләләр циклы, методика һәм технологияләр уйлап табу яки булдыру буенча материаллар, фәнни-техник әсбаплар авторлары гына түгел, татар телендә укыту әсбаплары авторлары да катнаша алачак.
Циклдагы мәкаләләрнең минималь саны җидедән бишкә кадәр киметелә, әмма алар барысы да Россия фәнни цитаталау индексы (Российский индекс научного цитирования, РИНЦ) базасына кертелгән басмаларда чыккан булырга тиеш. Элек мондый таләп юк иде.
Грант конкурсы Татарстанда 2016 елдан башлап «Татарстан Республикасының дәүләт телләре һәм Татарстан Республикасында башка телләрне саклау, өйрәнү һәм үстерү» дәүләт программасы кысаларында үткәрелә. Аның өчен акчалар төбәк бюджетыннан бүлеп бирелә. Элек рус яки башка телләрдә башкарылган һәм татар теленә тәрҗемә генә ителгән проектлар конкурста катнаша алмый.
Конкурс кысаларында алты юнәлеш каралган: татар теле, әдәбияты, фольклор һәм сәнгате; Татарстан һәм татар халкы тарихы; мәгарифнең төбәк проблемалары; медицина, биология, экология, авыл хуҗалыгы фәннәре; математика, физика, химия, геология һәм география; машина төзелеше проблемалары һәм төзелеш технологияләре, мәгълүмати технологияләр.