Абхазия Республикасы президенты Аслан Бжания 15 июльдә Россия опера җырчысы, Россия Федерациясенең атказанган артисты, Башкортстан һәм Татарстанның халык артисты Илдар Абдразаков һәм Россия Федерациясе һәм Абхазия Республикасының халык артисты Хибла Герзмава белән очрашты, артистларга «Хибла Герзмава чакыра...» фестивале кысаларында чыгыш ясаган өчен рәхмәт белдерде. Бу хакта «Башинформ» мәгълүмат агентлыгы яза.
«Сезнең Хибла Герзмава белән генә түгел, безнең кайбер ватандашлар белән дә дуслык мөнәсәбәтләрендә булуыгызны беләм. Бу безне куандыра. Абхазия сезнең өчен һәрвакыт ачык, сезнең килүгә һәрчак шат булырбыз», - диде Аслан Бжания опера җырчысына мөрәҗәгать итеп.
Ил Президенты указы белән Илдар Әмир улы Абдразаковка «Абхазия Республикасының халык артисты» исеме бирелде.
«Абхазия белән Россия арасындагы бу бәйләнеш безне мәдәни яктан җылырак һәм яктырак итә. Минем өчен Россиядә дә, Абхазиядә дә Хибла Герзмава фестивалендә чыгыш ясау – зур дәрәҗә. Бу минем беренче тапкыр килүем түгел, һәм мин һәрвакыт биредәге төрле мәйданчыкларда абхаз халкына карата дулкынлану хисе һәм мәхәббәт белән чыгыш ясыйм», — дип билгеләп үтте Илдар Абдразаков.
Дөньякүләм танылган бас кичә «Хибла Герзмава чакыра...» XXII музыкаль фестиваленең концерт-ачылышында катнашты. Ул Абхазиянең икенче президенты Сергей Багапшның тууына 75 ел тулуга багышланган булган. Бу хакта Яшь талантларга ярдәм итү һәм аларны алга этәрү һәм Илдар Абдразаковның халыкара мәдәни элемтәләрен үстерү фондының матбугат сәркатибе Тамара Эрманд хәбәр итте.
