Татарстаннан 400дән артык бала Кара диңгез яры буе лагерьләрендә ял итәчәк
Дүшәмбе, 15 июльдә, Татарстаннан 400дән артык бала Кара диңгез яры буе лагерьләренә өченче сменага китте – 204 бала Витязево (Анапа) лагеренә, 209 бала «Сәләт – Ак Барс» (Кырым) яшьләр үзәгенә тотты. Искәртик, бу вакыт эчендә Кара диңгез лагерьләрендә Татарстаннан 3 меңнән артык бала инде ял итәргә өлгерде, дип хәбәр итә ТР Яшьләр эшләре министрлыгы.
Билгеләп үтик, Кара диңгез яры буенда өч лагерь – «Витязево» (Анапа), «Глобус» (Анапа), «Сатера» (Кырым) лагерьләрендә балалар ялын ТР Яшьләр эшләре министрлыгы ярдәме белән «Черноморец» республика үзәге, ә «Сәләт – Ак Барс»та (Кырым) ялны «Сәләт – Ак Барс» яшьләр үзәге оештыра.
«Республиканың төрле шәһәрләр һәм районнарыннан балалар бүген диңгезгә ял итәргә китте. Иң беренче чиратта балаларның иминлегенә аерым игътибар биреләчәк, бу мәсьәлә югары дәрәҗәдә оештырылды, юлда да, ял вакытында да. Балалар һәм педагогик составның китү һәм кайтуы үзәкләштерелгән рәвештә, билгеләнгән санитар-эпидемиологик таләпләргә һәм кагыйдәләргә ярашлы рәвештә, озата бару, туклану, эчү режимын оештыру белән үткәреләчәк», - дип сөйләде ТР яшьләр эшләре министры урынбасары Денис Лулаков.