Татарстан гаиләсеннән балалар уен мәйданчыгы урынына үз акчаларына фронт өчен УАЗ сатып алган. Бу хакта алар «Җиңү армиясенә кушыл!» телемарафонында сөйләделәр.
Түбән Кама районы Благодатное авылыннан Казамаровлар гаиләсе фронтка ярдәм күрсәтә – ата-аналар окоп шәмнәре ясый, техника сатып алу өчен акча җыя. Аларның балалары – уллары Лев һәм Яков, кызлары Татьяна, ата-аналары үрнәгенә ияреп, үз акчаларын хәрбиләргә ярдәм өчен бирергә карар кылганнар. Алар балалар мәйданчыгына акча җыйган булган, аннары махсус хәрби операциядә катнашучылар өчен УАЗ сатып алуга биргәннәр.
«Безнең үзебезнең 270 кешедән – күрше торак пунктларда яшәүчеләрдән торган «Благо» волонтерлык төркеме бар. Бергәләп гуманитар ярдәм җыябыз. Бер УАЗикны фронтка җибәрер алдыннан төзәттек. Аннары гаилә белән кичке аш ашап утырганда, тагын бер машинага заявка килде. Балалар моны ишетеп, үз акчаларын бирергә тәкъдим иттеләр», – дип уртаклашты гаилә башлыгы Николай Казамаров.
«Солдатларга машина сатып алыр өчен, без бергәләп үз акчаларыбызны бирергә карар иттек. Туган көннән башлап, бик озак җыйдык», – дип сөйләде олы балалары Татьяна.
Үз балаларын белгән ата-аналар мондый карарга аптырап та калмаган.
«Мин башта: «Ничек инде, без бит балалар мәйданчыгына акча җыйган идек, урын да әзерләп куйган идек, заказ бирәсе генә калды», – дигән идем. Аннары хатыным белән уйлаштык – әгәр балалар ярдәм итәргә тели икән, бу Җиңүне якынайтачак», – диде Николай.
Елена һәрвакыт балалар белән махсус операция сугышчылары өчен гуманитар ярдәм җыйганнарын әйтте.
«Без гел бергәләп окоп шәмнәре ясадык, балалар гел ярдәм итте: банкалар чистартты, картон кистеләр. Коры душлар ясарга булыштылар. Без – бербөтен, беркемне мәҗбүр итмибез, шуңа күрә балаларыбыз да шундый», – дип сөйләде Елена.
