Хәрби үзенең махсус операциягә китүе турында: Указ чыккач мобилизация буенча киттем

Үз мәнфәгатьләребезне хәзер якламасак, дошман соңыннан монда киләчәк. Бу хакта «Җиңү армиясенә кушыл!» телемарафонында махсус операциядә катнашучы, 430 нчы мотоукчылар полкының психология хезмәте җитәкчесе Андрей Сарбаев сөйләде.

«Миндә алгы сафта булыргамы-юкмы дигән сорау тумады. Президент карары чыккач, мобилизация буенча киттем. Мин запастагы офицер. Бу минем бурыч. Безнең 430 нчы полк 2022 елның декабреннән бирле Көнчыгыш гаскәрләре составында Угледар юнәлешендә. Без Татарстан полкы исемен горур йөртәбез. Анда безнең позицияләр өстендә Татарстан әләме җилферди, авыр, тик кирәкле эш башкарабыз. Балаларыбыз һәм оныкларыбыз тыныч яши алсын өчен эшлибез», – дип сөйләде хәрби.

Андрей Сарбаев хатыны һәм балалары аның белән горурлануын сөйләде.

«Гаиләбез – безнең ышанычлы тыл. Ата-бабаларыбыз истәлеге анда безгә ярдәм итә. Татарстан алгы сафта актив катнаша һәм ярдәм итә. Татарстан Рәисе, Премьер-министр – контрольдә тота, безгә кирәкле корал һәм техника, элемтә чаралары һәм башка нәрсәләр белән гел ярдәм итеп тора», – диде хәрби.

Шулай ук ул сугышчан кардәшлеккә нинди кешеләр керүе һәм килешү төзергәме-юкмы дип икеләнгәндә ничек карар кабул итәргә икәнен дә сөйләде.

«Сугышчан кардәшлеккә барысын да синең белән бергә узган кешеләр керә. Иптәшең синең аркаңны каплый. Безнең мөселманнар намаз укыганда, башка дин вәкиле басып, аларны карап тора. Православие динендәгеләр белән дә шулай ук. Аллаһ белән аралашу алгы сафта бик нык булыша. Сезнең өчен Ватанның нәрсә аңлатканын ачыкларга киңәш итәм. Бу сезнең оныкларыгызның киләчәге, ата-бабаларның хәтере. Әгәр саклаучы булырга, ир-ат булырга әзер икәнсез, карар кабул итәргә тиешсез. Ватан өчен гомерне бирергә әзер булырга кирәк. Үз мәнфәгатьләребезне хәзер якламасак, соңыннан дошманнар монда киләчәк», – дип йомгаклады ул.