Актаныш районы хәрби комиссары Ленар Әхмәтҗанов контракт буенча хезмәт итәргә теләүчеләрнең артуын билгеләп үтте. Потенциаль хәрбиләр арасында күрше Башкортстан Республикасы кешеләре дә бар.
Хәрби комиссар Татарстан Республикасында контракт буенча хезмәт итәргә теләүчеләргә бер тапкыр бирелә торган акчаның күләме 500 мең сумга арттырылуы хакында искәртте. Шул рәвешле, хәзер ул 1 миллион 5 мең сум тәшкил итә. Саклану министрлыгы да бер тапкыр 195 мең сум акча бирә. Актаныш районыннан да өстәмә акча каралган.
«Контракт буенча хезмәт итү мөмкинлеге хакында без танышлар аркылы хәбәр итәбез. Күптән түгел Башкортстаннан бер егет килде, Себердә эшләп кайткан. Безнең хәрби комиссариат аша контракт буенча хезмәт итәргә теләвен белдерде. Без бер көн эчендә медицина тикшерүе үткәрәбез. Барлык шартларны аңлатабыз», - диде Ленар Әхмәтҗанов.
Хәрби комиссар «Батыр» батальонына кешеләр туплау дәвам итүен әйтте. Анда хөкемгә тартылмаган, сау-сәламәт һәм үз теләге белән килүчеләрне генә җыялар.
Махсус хәрби операция РФ Президенты Владимир Путин карары буенча 2022 елның 24 февраленнән үткәрелә. Хакимият берничә тапкыр аның куелган максатларга ирешкәнче дәвам итәчәген белдерде. Максатлар арасында Россиянең иминлеген гарантияләүче шартлар булдыру да бар.
РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була.
Материал Рузилә Хәсәнова катнашында әзерләнде