РФ мөселманнары Диния нәзарәте делегациясе Түбән Новгород өлкәсенең Мәдәнә авылында «Рәшидә» мәчете ачылуның 30 еллыгына багышланган тантаналы чарада катнашты. Бу хакта Россия Мөфтиләр шурасының матбугат хезмәте хәбәр итә.
Делегация составына Россия Мөфтиләр шурасы рәисенең беренче урынбасары, РФ мөселманнары Диния нәзарәте рәисе урынбасары, мөфти Рушан Әббәсов, РФ мөселманнары Диния нәзарәте рәисе урынбасары – эшләр идарәчесе Рәфыйк Фәттахетдинов, РФ мөселманнары Диния нәзарәтенең Үзәкләштерелгән ревизия комиссиясе рәисе Җәфар Фәйзрахманов һәм РФ мөселманнары Диния нәзарәте рәисенең беркетмә башлыгы Динар Гайнетдинов керде. Чарада шулай ук РФ мөселманнары Диния нәзарәте рәисе һәм Россия Мөфтиләр шурасы рәисе, мөфти шәех Равил Гайнетдиннең Идел буе федераль округындагы тулы вәкаләтле вәкиле Мөнир Беюсов, Кызыл Октябрь районы башлыгы Рафаэль Ильясов, Түбән Новгород өлкәсе мөселманнары Диния нәзарәте рәисе Гаяз Закиров, хәйрияче Фәиз Гыйльманов, Мәскәүнең Тарихи мәчете имам-хатыйбы Рамил Садыйков, Түбән Новгород өлкәсе мөселманнары Диния нәзарәте имамнары, Мәдәнәдә һәм күрше авылларда яшәүчеләр катнашты.
Рушан хәзрәт чарада катнашучыларга мөрәҗәгатендә Россия мөселманнарының рухи лидеры, мөфти шәех Равил Гайнетдин исеменнән сәламләү һәм әлеге әһәмиятле дата белән котлау сүзләрен тапшырды. Ул билгеләп үткәнчә, «Рәшидә» мәчете Россиядә заманча мөселман архитектурасының искиткеч үрнәге һәм Мәдәнә авылының гына түгел, ә Түбән Новгород өлкәсенең төп истәлекле урыннарыннан берсе санала.
Рушан Әббәсов туган авылында Аллаһ йорты салырга ниятләп, әлеге нияте тормышка ашсын өчен зур көч куйган меценат Фәиз Гыйльмановка рәхмәт әйтте. Мәгълүм булганча, «Рәшидә» мәчете 1994 елда мөселманнар өчен үз ишеген ачты.
Рушан Әббәсов сүзенең ахырында билгеләп үткәнчә, һәр мәчетнең төп вазифасы - аның эчендә гыйбадәт кылу. Шуңа күрә мөселманнарның, Аллаһ йортына килеп, намаз укуы, файдалы белемнәр алуы һәм ислам дине нигезләрен үзләштерү өчен балаларын да бирегә алып килүе мөһим.