«Юл» җирле мөселманнар дини оешмасының Зәйнулла Рәсүлев исемендәге дини үзәге базасында Рәүл Төхвәтуллин җитәкчелегендә җәйге мөселман лагере эшли башлады. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.
Биредә ике атна дәвамында балалар өчен Ислам нигезләре буенча үсеш курслары, шулай ук төрле дини-сәламәтләндерү чаралары узачак. Дәресләрне балалар һәм яшүсмерләр өчен махсус программа буенча югары теологик белемле тәҗрибәле укытучылар үткәрәчәк.
Лагерь программасында Ислам һәм әхлак нигезләре буенча дәресләр, күмәк намазлар, парк һәм уен мәйданчыкларында йөрү, спорт белән шөгыльләнү һәм төрле экскурсияләр булачак. Балалар хәләл кайнар ризык белән дә тәэмин ителәчәк, диелә хәбәрдә.
