«Cessna 172» җиңел моторлы самолеты экскурсия вакытында Кама Тамагы янында һәлакәткә очраганнан соң, Татарстан Рәисе Рөстәм Миңнеханов республикада барлык очучы аппаратларны һәм очышлар оештыруны исәпкә алырга кушты. Ул бу хакта төбәкнең Хөкүмәт Йортында узган традицион киңәшмәдә сөйләде, дип хәбәр итә ТР Рәисенең матбугат хезмәте.
«<...> хәзер ачыкланганча, анда рөхсәт тә булмаган, һәм ул (пилот – Т-И. иск.) үзе ничек кирәк дип санаган, шулай очкан. Бу, гомумән, шундый тәртипсезлек, бигрәк тә очучы аппаратлар белән. Мин монда барлык очучы аппаратлар һәм аларның очышларны ничек оештыруын тикшерергә, исәпкә алырга куштым», - дип белдерде республика җитәкчесе.
«Монда Транспорт министрлыгы да [катнашырга тиеш] – сез дә бераз авиация күзәтчелеге хезмәтләре белән бергә тыңлагыз. Барысы да исәпкә алынырга, барысы да каты авиация регламенты буенча эшләргә тиеш <...>. Мин Федераль иминлек хезмәте һәм башка хокук саклаучы органнарга шундый йөкләмә бирдем», - диде ул.
«Бу нормаль түгел! Ничек кешеләрне йөрткән ул?! Очышлар булуына берәү дә каршы түгел бит. Болар барысы да рөхсәт алыр өчен һава хакимияте белән оештырылырга тиеш. Сез моның нәрсә икәнен күз алдыгызга китерәсезме? Ничек инде шулай?! Кешеләр килгән, заказ биргән. Алар бит инде самолет оча икән, димәк, ул барлык рөхсәтләргә дә ия, дип ышана. Хәзер исә без шушындый тәртипсезлекләр турында белдек. Җирле халык та зарланган булган – берәү дә игътибар итмәгән. Кешеләрне кызганыч! Гаилә <...> ял итәргә килгән. Менә шундый хәл, бик күңелсез», - дип йомгаклады сүзен Рөстәм Миңнеханов.
10 июль иртәсендә экскурсия вакытында Кама Тамагы янында һәлакәткә очраган Cessna 172 җиңел моторлы самолетының бортында өч кешелек гаилә очкан. Пилот, әни кеше белән бала үлә, ә гаилә башлыгы күпсанлы җәрәхәтләр ала. һава судносының хуҗасы, суд тыюына карамастан, авиайөртүләр белән шөгыльләнгән. Чик кую чарасы мәсьәләсе карау стадиясендә.
