Авыл хуҗалыгы һәм азык-төлек министрлыгының элеккеге түрәсе ришвәтчелектә гаепләнә
Татарстан Республикасы тикшерү органнары ТР Авыл хуҗалыгы һәм азык-төлек министрлыгының элеккеге хезмәткәренә карата җинаять эшен тикшерүне тәмамлады. Хатын-кыз бюджет субсидияләрен законсыз алуда ярдәм иткән өчен ришвәт алуда гаепләнә, дип хәбәр иттеләр РФ Тикшерү комитетының ТР буенча идарәсендә.
Тикшерү мәгълүматлары буенча, гаепләнүче 2018 елда, Терлекчелектә нәсел эше буенча баш дәүләт авыл хуҗалыгы идарәсенең план-хисап бүлеге җитәкчесе вазифасын башкарганда 25 мең сум күләмендә ришвәт алган. Моның өчен ул фиктив документлар нигезендә «Казан» нәселле ат заводы» җаваплылыгы чикләнгән җәмгыятенә 10 миллион сумнан артык субсидия бүлеп бирүдә ярдәм күрсәтә.
Бер елдан соң элеккеге түрә «Динамо» ат чабышы клубы» коммерцияле булмаган автономияле оешмасы өчен 15 миллион сум субсидия алуда ярдәм күрсәткән өчен тагын 50 мең сум акча ала.
Җинаять эше карау өчен судка җибәрелгән.