Татарстан Рәисе Рөстәм Миңнеханов һәм Россия Федерациясе Энергетика министры Сергей Цивилев Әлмәттә Татарстан Республикасы Нефть саммиты мәйданчыгында эковолонтерлар һәм яшь экологлар олимпиадасында җиңүчеләр белән очрашты. Бу турыда Татарстан Рәисе матбугат хезмәте хәбәр иттею
Балалар табигатькә сакчыл караш, ресурслардан нәтиҗәле файдалану һәм яшьләрдә экологик җаваплылык күнекмәләрен формалаштыру проектларында катнашулары турында сөйләделәр. Мәсәлән, «Мәктәп биолабораторияләре» проекты кысаларында укучылар микроклонлаштыру ысулы белән чыгарылган үсемлекләр үстерәләр.
Хәзерге вакытта республикада 9 мәктәп биолабораториясе, 2 теплица һәм 1 мини-ботаника бакчасы ачылган. Проектта 300гә якын укучы катнаша. Укучылар үстергән үсентеләр шәһәр киңлекләрен яшелләндерү һәм урманнарны торгызу өчен кулланыла.
Үз чиратында, укучылар кунаклардан киләчәктә нинди һөнәрләр иң кирәклесе булачак, илнең альтернатив энергетикасы һәм энергия тармагы үсеше перспективалары белән кызыксындылар.
«Безнең ягулык-энергетика комплексы Россия икътисадында мөһим роль уйный. Һәр йортта ут яна, барысы да машиналарда йөри, төзелештә кулланылган материаллар - барысы да ягулык-энергетика комплексы. Бу тармак бөтен илне тоташтыра. Ул сәнәгать, фән һәм мәгариф өлкәсендә төп заказчы булып тора. Сез ресурслардан нәтиҗәле файдалануга юнәлгән мөһим проектларда катнашасыз. Шулай итеп, сез барыгыз да ягулык-энергетика комплексында катнашасыз», - диде Сергей Цивилев.
Рөстәм Миңнеханов шулай ук балаларга республика өчен мөһим инициативаларда актив катнашулары өчен рәхмәт белдерде. «Без сезнең белән очрашуыбызга бик шат. Сез - үз республикагызның, үз илегезнең чын патриотлары. Мәктәптә укыганда, сез экология һәм табигатьне саклау мәсьәләләренә зур игътибар бирәсез. Бу бик мөһим. Мин сезгә дә шулай ук актив булып калугызны телим. Сез яшь, мөмкин кадәр күбрәк күнекмәләр һәм компетенцияләр алырга тырышыгыз», – дип өстәде Татарстан Рәисе.
