Махсус хәрби операция зонасындагы хәрби хәрәкәтләргә контракт буенча хәрби хезмәткәрләр зур өлеш кертә. Шуларның берсе – Татарстанның Кайбыч районы Борындык авылыннан Алмаз Нигъмәтҗанов. Хәзерге вакытта ул туган йортында кыска вакытлы ялда. Бу турыда «Татар-информ» яза.
«Борындыкта әти-әнием – Айрат һәм Розалина Нигъмәтҗановлар яши. Сеңлем Гөлназ белән бик тату үстек, хәзер ул Казанда тора. Унсигез яшем тулгач, армиягә чакырдылар. Хәрби бурычымны Ульяновск шәһәрендәге һава-десант гаскәрләрендә үтәдем», - дип сөйли үзе турында хәрби.
Алмазның әтисе механизатор булып эшләгән, егет тә һәрвакыт әтисе янында булган, техниканы өйрәнгән, шуңа күрә автомобиль йөртүче һөнәрен сайлаган. Контракт буенча хәрби хезмәткә чакырылганчы, Казанда әлеге белгечлек буенча эшләгән.
Махсус операция башлангач, 2022 елда Алмаз беренчеләрдән булып алгы сызыкка китә. Аның белән бергә икетуган энеләре дә бара.
«Күпчелек очракта машиналарда төнлә йөрибез. Мондагы шартларга күнектек инде, кеше барлык кыенлыкларга да җайлаша», - дип аңлатты хәрби хезмәткәр.
«Безнең район егетләренә шуны әйтергә телим: хәрби хезмәткә бару өчен контракт төзүдән курыкмагыз. Иң мөһиме — үзеңне саклау», - дип белдерде хәрби.
Материал Мингазиз Сөнгатуллин ярдәмендә эшләнде.
