Бүген, 8 июльдә, ТР Дәүләт Советы бинасында Илдус Мостюков белән хушлашу мәрасиме булды. Бу турыда «Татар-информ» хәбәрчесе Җәмил Сәлимгәрәев яза.
Халык Дәүләт Советы бинасы янына иртәнге 8дә үк җыела башлады. Ишекләр ачык булса да, керергә ярамый иде. «Без күрше йортларда яшәдек, - дип үзара сөйләшә җыелган кешеләр. – Без бергә укыдык». 8.50 сәгатьтә кешеләргә икенче катка күтәрелергә рөхсәт иттеләр. Бинада веноклар, канәфер чәчәкләре куелган өстәл һәм мәрхүмнең мәете янындагы мактаулы каравыл тора. Мәрхүмнең аягы янында дистәләгән орден-медальләре куелган.
Мактаулы каравылдагы дүрт хәрби Мостюковның мәетен саклый. Алар арасында – кулларына кызыл бәйләвечләр тоткан гражданнар. Каравылдагылар алышынып тора. Сәгать уннарга Татарстан Дәүләт киңәшчесе Минтимер Шаймиев, Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Дәүләт Советы Рәисе урынбасары Марат Әхмәтов, Россия Герое Рәсим Баксиков һ.б.каравылда булырга өлгерде.
Залга мәрхүмнең туганнары, дуслары, дусларының балалары һәм аларның студентлары, сугыш ветераннары һәм профессорлар, депутатлар, министрлар җыелды. Мостюковның көтмәгәндә китүен кешеләр бик авыр кабул иткән, әмма Шәймиев өметсезлеккә бирелмәскә чакыра: «Тормыш шундый».
«Без бары тик соңгы елларда гына ул гомерен багышлаган хезмәтнең мөһимлегенә күзебезне ача башладык», - диде Татарстанның Дәүләт Киңәшчесе.
Кемдер Илдус Мостюковны «иң серле татар» дип атый, кем өчендер ул күп сөйләшми торган җитәкче булган. «Үзеңнеке-читнеке» системасы аның инициативасы белән проектлана. Бу чын мәгънәсендәге серле эшнең нечкәлекләрен якын арада гына белүебез икеле, әмма аның нәтиҗәләреннән без әлегәчә файдаланабыз. Аның ярдәмендә солдатлар өйләренә әйләнеп кайта, сугышчан бурычларны нәтиҗәле үти. Мостюков беркайчан да хәрби кеше булмады, әмма хәрбиләр өчен ул – сугышчан иптәш, дип саный хушлашу мәрасименә килгән Россия Геройлары.
«Технологик процесслар үзгәрә, барысы да алмашына. Бары тик Илдус Мостюков нигез салган принциплар гына әлегәчә саклана», - диде ТР Фәннәр академиясе президенты Рифкать Миңнеханов.
Аны бөтен Россия талантлы галим буларак белә, РФ Хөкүмәте башлыгы Михаил Мишустин да мөрәҗәгатендә шул хакта искәртте. Татарстан өчен Мостюков – җәмәгать эшлеклесе һәм сугыш, хезмәт геройларына ярдәм күрсәтү белән шөгыльләнә торган «Татарстан Геройлары» оешмасына нигез салучы. Әлеге оешма төзелгәнче Социалистик Хезмәт Геройларының ташламалары юк иде диярлек, дип искә ала Мостюковның хезмәттәшләре. «Герой исемен кайчан алдыгыз?» – «20 еллар элек. Бу 1986 ел иде».
Мөхәммәтшин һәм Шәймиев үз сүзләрен әйткәч, хәрбиләр, производство һәм белем бирү учреждениеләре җитәкчеләр кайгы уртаклашкач, Камил хәзрәт Сәмигуллин җеназа намазын укыды.
