Максим Горький исемендәге Үзәк мәдәният һәм ял паркында «Татарстан халыкларының җиде туе» бәйрәме узды. Күңелле кичә «Тормыш агачы» («Байтирәк») проекты кысаларында оештырылган. Казан мэриясенең Башкарма комитеты Тел культурасы өлкәсендә милли сәясәтне гамәлгә ашыру бүлеге җитәкчесе Айсылу Лерон әлеге чараның гаять әһәмиятле булуын билгеләп үтте.
«Әлеге чараны Казан шәһәре мэриясе һәм ТР Халыклар ассамблеясе үткәрә. Ул Туган телләрне саклау комиссиясе ярдәмендә гамәлгә куелды. Проект 3нче ел рәттән оештырылды. Быелгы чараларны РФ Гаилә елына багышларга булдык. Әлеге чара күңел ачуга караганда, күбрәк мәгърифәти рухтагы проект», – диде Айсылу Лерон «Татар-информ» хәбәрчесенә.
Татар, керәшен, башкорт, мари, мордва һәм башка халыкларның туй йолаларыннан тыш, чара барышында төрле остаханәләр эшләде. Чара барышы белән Казан мэры Илсур Метшин да танышты һәм халык белән аралашты.
Әңгәмәдәш «Тормыш агачы» проектының чираттагы чарасы август аена планлаштырылуын әйтте. «Киләсе чарабыз балачак темасына багышланачак. Ул сабыйга исем кушуны, балалар йолаларын һәм уеннарын үз эченә алачак. Гомумән, әлеге проект — төрле милләтләрне бер-берсенең гореф-гадәтләре белән таныштыра, берләштерә», — диде ул.
Тамашачылар өчен остаханә нокталары, фольклор коллективлары чыгышлары һәм халык уеннары әзерләнгән иде. Мәсәлән, халык үз куллары белән «кияү пәрәмәче» ясап, шунда ук кыздырып алып сыйлану мөмкинлегенә ия булды.
