Татарстанның Тукай районы Кече Шилнә авыл җирлегендә куәте 42 мең тонна тәшкил иткән элеваторны төзү эшләре тәмамланган. Бу хакта ТР Дәүләт төзелеш күзәтчелеге инспекциясе матбугат хезмәте хәбәр итә.
Элеватор ике керү урыны булган кабул итү җайланмасын, ашлык чистарту корылмасын, дүрт оператив ашлык саклау силосын, һәркайсы сәгатенә 100 планлы тоннага исәпләнгән ике Strahl 11000FR ашлык киптерү җайланмасын, автотранспортка төяп җибәрү бункерларын, конвейер галереясын, яссы төпле ун силосны, диспетчерлык үзәген, өч вышканы, хезмәт күрсәтү мәйданчыклары һәм бункерлары булган конвейер эстакадасын берләштерә.
Объектның төзүчесе - «Чаллы элеваторы» АҖ, техник заказчысы - «Челны-Бройлер» ҖЧҖ («Агросила» холдингына керә). Генераль подрядчысы - «КЭР-Промстрой» ҖЧҖ, әмма чынлыкта эшләрне «Воронеж инжиниринг компаниясе» ҖЧҖ башкарган. Комплексны «Техпроект» ҖЧҖ проектлаган.
«Вести Камаза» газетасы белешмәсе буенча, элеватор төзелешенә инвестицияләрнең гомуми күләме 1,4 миллиард сумнан артып киткән. Шул ук вакытта, «Агросила» хәзер ашлык эшкәртү күләмен арттырып кына калмыйча, ашлык тузаны чыгуны елына 7,8 тоннага киметергә дә ниятли. Тузан чыга торган чыганаклар саны 32 берәмлеккә азаячак, шулай ук җиһаз эшләгән вакыттагы тавыш та кимиячәк, диелә хәбәрдә.
