Чаллы хастаханәсе белгече Кызыл диңгезгә әләм белән төшкән
Халыкара дайверлар командасы составында Чаллының 5нче хастаханәсенең баш программисты Динар Гыйльманов Кызыл диңгезгә сәяхәткә барды. Ул йөзенче тапкыр су астына төште. Һәм бу рекордын үзе эшләгән хастаханәгә багышлады - 25 метр тирәнлеккә учреждениенең әләмен алып төште. Бу хакта «Шәһри Чаллы» газетасы сайтында Сәрия Гарипова яза.
Динар Гыйльманов биредә 7 ел хезмәт куя. Ике югары белеме булган инженер программист компьютерлар, медицина җиһазларының туктаусыз эшләвен, ә иң мөһиме - хастаханәнең мәгьлүматииминлеген тәэмин итә. Ул 10 ел дәвамында донор буларак кан тапшыра.
«Кемнеңдер гомерен саклап кала аласың икән, икеләнүләрсез ярдәм ит», - ди шәһәрдәшебез.
Ул инде 12 ел дәвамында дайвинг белән шөгыльләнә. 42 метр тирәнлеккә төшкәне дә бар. Бу мавыгуы аңа үз-үзен җиңәргә, су асты табигатенең матурлыгын күрергә ярдәм итә.