Татарстанда «Яр Чаллы элеваторы» акционерлык җәмгыятендә булган фаҗигале вакыйга факты буенча җинаять эше кузгатылды, дип хәбәр иттеләр ТР Прокуратурасында.
Эш РФ Җинаять кодексының 143 маддәсенең 2 өлеше (саксызлык аркасында кеше үлеменә китергән хезмәт саклау кагыйдәләрен бозу) буенча квалификацияләнгән. Тикшерү прокуратурада контрольгә алынган.
Искәртик, фаҗигале вакыйга бүген 09:00 сәгать тирәсендә булды. Силос корпусларының берсендә технологик җиһазларны тикшергәндә 36 яшьлек останың аягы эчкә суырылып кереп китә. Алынган җәрәхәтләрдән ир-ат ашыгыч ярдәм машинасында вафат була.
