Шапки бистәсенең Нестеров күле яр буенда беренче тапкыр өлкә бәйрәме статусында «Ленинград сабантуе – 2024» узган. Бу хакта Татарстанның Санкт-Петербург шәһәре һәм Ленинград өлкәсендәге Даими вәкиллеге хәбәр итә.
Ленинград өлкәсенең җирле үзидарә, милләтара һәм конфессияара мөнәсәбәтләр комитеты рәисе Лира Бурак Ленинград өлкәсе Губернаторы Александр Дрозденконың сәламләү сүзләрен укыды, диелә хәбәрдә.
«Бай тарихы һәм тирән традицияләре белән билгеле булган әлеге чын халык бәйрәме, төрле мәдәният һәм милләт кешеләрен берләштереп, шатлык һәм татулык китерә», - дип тапшырган ул Губернатор сүзләрен.
Татарстан Республикасының Даими вәкиле вазифаларын вакытлыча башкаручы Шамил Шәяхмәтов шулай ук барысын да Сабантуй бәйрәме белән котлаган. Ул Ленинград өлкәсе активистларын татар милли мәдәниятен саклаган һәм үстергән өчен рәхмәт хатлары белән бүләкләгән.
Бәйрәм кунаклары өчен традицион пылау, чәк-чәк, казылык һәм башка милли ризыклар белән өстәлләр корылды. Әлеге сыйларны Татарстан һәм Башкортстан эшкуарлары алып килде. Шулай ук бәйрәм кунаклары билбау көрәшчеләре ярышын карый һәм башка традицион уеннарда катнаша алды, диелә хәбәрдә.
